تاني يوم صيام .. محتاجين اب ديت لعلاقتنا باهلنا ، وفورمات لمفهوم الذكاء

سلام عليكم ، ازيكم ، مع اني مش شايف تعليقات الا بالصدفة او حد من اللي اعرفهم بس هتكلم كان حد بيقرا ، قشطة؟ قشطة

النهاردة كنت بفكر في موضوع مختلف شوية ، عن رضا الوالدين ، اد ايه فايدة رضاهم في الدنيا ودعاهم وفرحتهم لكل اللي يفرحنا وخوفهم علينا مبنعرفش نقابله بنفس القدر او الكيفية حتى ، وحاجة كمان فكرت فيها شوية وتاملتها في نماذج قرايبي او اصحابي ، اد ايه رضا الوالدين مبيبقاش بنفس رضا الابناء ، يعني .. ممكن يكون الاهل راضيين عننا بس احنا لا !؟ تصور انت بقى الغباء اللي عند حد مش راضي عن اهله عشان اختلفوا معاه في حاجة او ماثرين على قراراته ، طبعا انا مش هقعد اتكلم ليه رضاهم واجب وليه مش هنقدر نوفيهم حقهم مهما عملنا لان ده امر بديهي ومعروف ، لكن هتكلم ليه احنا مبنحاوش نضيف رضاهم عننا شعور الحب والمودة ، يعني هدية كل فترة او في اعياد ميلادهم او حتى بدون مناسبة ، حاجة تفرحهم نعملها عشان يفرحوا ، حاجة بتخوفهم علينا منعملهاش شوية بس عشان منزودش قلقهم خصوصا اللي بينزل مظاهرات واهله بيخافوا عليه ومعارضين ده ، انا الحمد لله بيشجعوني عليها مش عشان الايجابية طبعا لكن عشان يرتاحوا مني هههههههههه ، لا بجد انا في فترة المراهقة خليت اهلي يتعودوا ان خوفهم يكون عليه من ارتكاب اي شيء غلط بس انما اي شيء صح حتى لو هيصيبني منه ضرر فده اختياري واي حد بيختار طريق وفاهم كويس تبعات اختياره هتكون ايه بيصمم يمشي في الطريق ده بشرط اني مسببش ضرر لغيري وخصوصا اقرب الناس ليه

عارفين .. لما اقرا عن حوادث او قضايا العيال اللي بيعملوها على نفسهم طالبين الحجر على اهاليهم عشان الفلوس او عشان اسباب مادية او حاجات تافهة بجد ، او نشوف حوالينا عائلات مفككة تماما بسبب الورث ومشاكله اقول فعلا احنا نستاهل كل اللي بيتعمل فينا ، اصلنا مش هنمثل يعني ونقول احنا مسلمين واحنا في الضياع بيفرقنا الجنيه وبيقطع صلات ارحامنا وبيخلينا نعادي اقرب الاقربين لينا ، وبتجمعنا حاجات عظيمة عشان بس نبكي على اللبن المسكوب ، الدين يتهان نعيط ونشتم الغرب ، نقعد ننتقد العرب والمسلمين انهم مش متحدين ومجتمعنا الصغير اصلا مفكك ومشرذم بفعل ما فكك الأمة كلها وهي الأنانية والذاتية ورؤية اخطاء الاخرين وتعظيمها ورؤية اخطاءنا وتحقيرها ، ازدواجية منيلة بنيلة بتخلينا نوجه لومنا على الغير دايما انما احنا لو حتى اعترفنا بغلطنا فبيبقى عادي يعني وكده وبتاع وشاي بالنعناع

موضوع الأهل وحبهم وودهم والحرص على طاعتهم وادخال السرور عليهم محتاج مننا شوية شغل على مستوانا الشخصي ، محتاجين نفرحهم اكتر ونقدم لهم خير اكتر ونساعدهم اكتر على التراحم بينهم وبين غيرهم لو عندنا القوة اننا نقوم بده ونؤثر فيهم بشكل لطيف وهاديء ومفيهوش توجيه اد ما فيه تذكير بفناء كل الماديات وبقاء اللي بينفع ويبقى في رصيدنا لما نقابل ربنا.. يارب نقدر نضيف لحبنا لاهلنا ويارب اللي علاقته مش تمام اوي يظبطها لانها بجد تفرق كتير اوي لما تعيش راضيين عنك او لا قدر الله يموتوا راضيين عنك ، حاجة اخيرة ماشي؟ ماشي .. بجد عظمة ديننا دي والله بتخللي الوادح يعجز عن وصفها .. حتى اللي والديه او احدهما مات يقدر يقدم لهم خير ينفعهم في اخرتهم ؟ والله احنا جبلات وما نستاهل الرحمة دي لاننا مبنتعرضش ليها - احنا صفة مخاطب للي يحس انه كده معلش بقى دقة التعبير استلزمت اللفظ البايخ ده - يعني نقدر ندعيلهم ونقدم خدمات تبقى صدقة جارية على ارواحهم او ننشر علمهم ان كانوا من اهل العلم ، بس بلاش موضوع التلاجة بتاعة الميه دي ونكتب عليها على روح فلان الفلاني .. مش شايفها عملية ، اللي يعمل كده طبعا كتر خيره بس مش احسن يعلم طفل يتيم برضه او يوجه فلوسه لشيء عملي ياخد عليه ثواب على طول؟ بتهيالي كده افضل

طيب .. موضوع الوالدين وياريت نقدر في الشهر ده نعمل فيه حاجة مفيدة ونستمر عليها بعد كده ، بالذات موضوع الهدية دي عشان بيفرق بجد وبيبقى اد ايه احساس جميل ، اللي مش واخد يهادي اهله هيستغربوا ويقولوا الواد او البت اتجننوا ولا حصلهم ايه .. كده فجاة جايبين لنا هدية .. خييير اللهم اجعله خير :) عادي متخدش الكلمتين دول على صدرك .. عشان هتكح طبعا :) هههههههه .. لا فوت يعني وعادي وكلمتين حلوين هتحس بعدها ان الدنيا جميلة بشعور الرضا والمودة والدعوتين اللي يمكن يكونوا من نصيبك فيدفعوا عنك ضرر او يجلبوا لك خير

الموضوع التاني بقى ، موضوع الذكاء .. اللي بيشوف نفسه ذكي وعنده فراسة ، مش فراسة الحاج محمد العباسي بتاع الافراح والمياتم ، لا فراسة بتاعة العرب ، ليه ميستخدمهاش في حاجة تفيد دينه ، يعني بنستخدمها في الشغل والحياة وعلاقتنا وكل ده .. عند ديننا نبقى هطل ونحس ان الدين مفيهوش ذكاء ، لا.. ممكن جدا نستخدم الذكاء لخدمة الدين ، يعني لما تحس بان حد معين واقع في مشكلة وتقدر تحلها من غير ما تورط نفسك وتجيب لنفسك وجع الدماغ وحل المشكلة دي انت عارف انك ممكن تقدم فيه خير طب ما تعرض ده بذكاء ولباقة واسعى في الخير لو تقدر تفيد الغير بدون ما تضر نفسك؟ ده مثال تقدر تقوم فيه بالصصلح بين اتنين بينهم مشاكل سببها سوء فهم او شيطان او اطراف بتشعلل وتولع

مثال تاني ، الاعراض عن الجهلاء ، كتير لما تسمع كلام حد بيردده وهو مش فاهمه بتحس انك عايز تريح دماغك عشان بتتفقع من الجهلة والببغاوات ، فبتقول يا عم دول شوية جهلة سيبك منهم ، مع ان بشوية تفكير وايضا ذكاء وقبلهم اخلاص لفكرتك خاصة لو متعلقة بالدين ممكن تبدا معاهم واحدة واحدة وتستحمل غلاستهم وتنطع بعضهم في سبيل انك تبدا بطريقة ذكية تؤصل المواضيع وتضطرهم انهم يقراوا ويفكروا ولو قراوا وفكروا هيهدوا شوية ومش لازم يقتنعوا برايك بس لازم يقروا اللي انت حابب توصله بشكل لطيف وبدون تعالي او تجهم ، احنا بنقع في المطب ده كتير وبتاخدنا الحمية وبننسى الهدف ، الهدف مش الدفاع او الهجوم اد ما هو توضيح الصورة ونشر الفكرة الصحيحة طالما تيقنت من صحتها والتعاون مع غيرها من الافكار اللي تضيف ليها

كفاية كده كلام النهاردة ، نكمل حكاوي القهاوي بتاعتي دي بكره ان كان لينا عمر ان شاء الله

سلام عليكم