طيب من نفسي، كل سنة وانتم طيبين

طيب .. نعمل زي الناس بقى ونقول كل سنة وانتم طيبين ، المشكلة اني مش قادر احسها بصراحة ولما برد على حد بتبقى نوع من المجاملة ليس إلا ، مش هنقلبها نكد يعني بس والله انا مابقدرش احس باي فرحة وانا حاسس بان في نفس الوقت فيه مسلمين بيتقتلوا وبيدبحوا وفيهم مش لاقيين ياكلوا ولا مأوى ولا أي حاجة ، صحيح انا مش مبعوث العناية الاهية لانقاذ البشرية المعذبة بس الاحساس بالتقصير فعلا مؤلم ، انك عايز تعمل حاجات كتير وتقريبا مبتعملش حاجة ولو بتعمل بتبقى حاجات بسيطة جدااا تكاد تكون لا تذكر

لما كتبت كل سنة وانتم طيبين .. واحنا لأ على ركن المصريين كنت قاصد افكر نفسي اولا بمآسي الأمة ، يمكن التقصير بيخلي الواحد حاسس دايما بالذنب في حق نفسه اولاً ، طاحونة الحياة والشغل والمسئوليات الصغيرة اوي بس بتسيطر على الفكر والعقل ، ومع ان بعض اصحابي لما بيقابلوني بيقولوا للناس كلها كل سنة وانتم طيبين وعبد الرحمن لأ :) بس عادي المهم اننا نبقى فاكرين وحاسين بقيمة الواجبات اللي علينا للأمة اللي بننتمي ليها زي ما بنشعر بواجباتنا تجاه كل شيء

لما افكر كده ، مفيش ولا بلد عربي مفيهاش احتلال وفساد واستبداد؟ مفيش اي صورة تبعث على التفاؤل والأمل !؟ حتى لبنان اللي انتصر فيها حزب الله أمنها مهدد داخلياً وفيها دمار وخراب ، العراق؟ يااه ده الناس نسيتها من كتر البلاوي اللي فيها واللي مش ملاحقين بس نتابع اخبارها او نعد الضحايا او حتى نعد التفجيرات المتلاحقة ، فلسطين!؟ الجرح العميق في نفسي وفي قلب الأمة!؟ طب بجد انا مش قادر الاقي شيء يبعث على الفرحة ، لكن رحمة ربنا واسعة ووعده حق هتنتصر الأمة بنا او بغيرنا ، يمكن تكون القضايا دي مش غايبة عننا فعلا لكن شعورنا بيها لا يعود الشعور بالحسرة والألم لكن لا يترجم الى عمل

طيب ، مش هطول عليكم بقى كل سنة واحنا لطاعة ربنا اقرب وكل سنة واحنا متمسكين بعقيدتنا وبديننا وكل سنة واحنا بنطور نفسنا يمكن نفيد أمتنا عملياً ونكون اضافة ليها مش زيادة عدد وخلاص ، كل سنة واحنا معترفين بتقصيرنا وكل سنة واحنا قادرين نواصل الحياة بصبر وعمل

الا صحيح ، بكره هتفطروا ايه؟ :) انا للاسف مش هقدر اسافر دمياط عشان افطر مع العيلة لان عندي شغل كتير بس هفطر مع خالاتي وجدتي وابن خالتي وبنته العسولة اللي مقدرتش اروح عيد ميلادها عشان انا ندل :) عادي يعني ، وبكره عندي مشاوير كتير وربنا يستر عشان الزحمة والواحد يلحق يروح حتى على الفطار .. ادعولي بقى خليكم جدعان ، وربنا يتقبل منا ومنكم صالح الأعمال يارب

اه بالحق نسيت اقولكم ، تابعونا على مجموعة المحروسة عشان ان شاء الله هيكون فيه حاجات كويسة اتمنى يارب تضيف لينا

سلام عليكم