اول يوم صيام .. محتاجين فورمات للنفس

من اجمل ما في الحياة علاقة الحب بين العبد وربه ، تحسها جامد اوي في اوقات الخلوة مع النفس ، تحس انك محتاج تقول حاجات كتير اوي لربنا ومش قادر ، ساعات بيكون الذنوب والبلاوي اللي بنرتكبها عامله حاجز بينا وبين رجوعنا لربنا واننا ندعيه واحنا مش مكسوفين من اعمالنا ومعاصينا وتقصيرنا في حق ربنا ، اد ايه الانسان لما يحس بحب ربنا كل ده بيدوب بالبكاء والدعاء ، زمان كنت لما اعرف حد ملتزم وصالح واشوفه بيبكي في الصلاة كنت ببقى مندهش ، ده الراجل ده بيعمل خير كتير وملتزم واخلاقه طيبه و .. و.. ، طب بيبكي ليه لما يسمع ايات عن النار واهل النار ، مكنش لسه الواحد عارف يعني ايه فتن ومحن وممحصات ويعني ايه ان كثرة العمل ليست الدليل على استقرار الايمان في القلب وان العملية مش مظهر ولا طريقة كلام اد ما هي طاعة بجد محتاجة اخلاص وعلم وعمل وألا يغتر الانسان بأي خير يقوم به ويشعر انه وكأنه ادى واجبه تجاه دينه وامته واهله بالخير ده ، كل ما افتكر حديث النبي في ما معناه ، ستكون فتن ، بقعد افكر اننا ممكن نكون من فتن الدنيا ، ساعات تقصيرنا في امور مينفعش فيها التقصير بيخلينا نفتن في ديننا ، يعني مثلا .. ازاي ابقى مسلم وانا مش عارف اي حاجة عن ديني اللي لما حد بيهاجمه بدافع عنه !؟ يعني مفروض نقرا في التوحيد عشان نعرف احنا بنعبد ربنا على اي اساس عقائدي؟ مفروض نتعلم من الفقه ولو حتى الحد الادنى اللي يخلينا نبقى عارفين احكام العبادات ونواقضها ومبطلاتها ، ما يجوز ومالايجوز وما يجب وما هو مكروه وما هو مندوب ، مفروض نتعلم ده عشان بابسط تقدير لما اؤدي فرض لربنا اقدمه وانا فاهم ومدرك قيمة ما اقوم به واتمنى القبول لان مش معنى اني قدمته ان ربنا قبله ، الالحاح في طلب قبول ربنا للعمل مهم جدا .... على اد ما الجهل شيء مفزع عموما على اد ما بشوف جهلنا بديننا شيء مينفعش نسامح نفسنا عليه ، ازاي مبقاش فاهم طبيعة حاجة بحبها؟ اللي بيحب الشعر وعنده موهبة بيتعلم اصول لغة وعروض وبيقرا في البلاغة وبيقرا كتير عشان تتكون عنده ثروة لغوية يقدر يجود فيها بشعره ويضيف احساسه ، وكذلك الأدب وكذلك اغلب الهوايات .. انا بفكر كده بيني وبين نفسي وحابب اكتب ده افكر بيه نفسي واللي ممكن يقرا لي ، مش حاسس ان احنا مهتمين بالمواضيع دي زي اهتمامنا بالسياسة او باي مجال بيشغل تفكيرنا وبنحب الاستزادة من معرفته

يمكن دي حاجة كنت بفكر فيها دلوقتي ، انا ربنا اكرمني ودرست حاجات مهمة في الشريعة عموما في اعدادي وثانوي لكن الدراسة غير تعليم الانسان لنفسه.. والبحث عن المعرفة تختلف تماما عن التلقين والتفريغ في الامتحانات

حاجة تانية كمان استشعرتها امبارح في اول يوم رمضان ، اللي حب قبل كده بيبقى عارف كويس ان مجرد ما اسم حبيبته يتقال ادامه قلبه بيدق وتركيزه بيبقى عالي وبيتنح ومش بعيد يفتح بقه ولو طلع الكلام عنها بجد ممكن يريل ، عادي يعني ، ولله المثل الاعلى ، ساعات بحس ان كلمة الله و يارب كلمة غالية اوي ، كلمة جميلة جدا تحس انك عايز تقولها في سرك على طول وتقول وراها كلام كتييير جدا ، مش لازم يكون دعاء ، ممكن يكون مصارحة ومكاشفة لعالم السر والعلن ، تحس انك عايز تعيط وانت بتقولها ومستشعر اد ايه انت .. اللي هو ضمير المخاطب ليه يعني عشان محدش يزعل .. فسل.. اي والله فسل ، ازاي متقولش الكلمة دي على طول؟ وازاي وازاي .. اسئلة كتير اوي تخطر على بالك بس في الاخر تقول يارب سامحني وتحس بطمعك في رحمة ربنا وباعترافك انك مش اهل ليها .. احساس وحش على فكرة ان الواحد ياخد جايزة كبيرة ميستحقهاش ، كل ما هيشوفها هيلوم نفسه ازاي انا اخد الجايزة دي وانا معملتش اي مجهود عشان اخدها؟

حاجة كمان استشعرتها وانا راكب الميكروياص بقى ومتاخر كالعادة ورايح افطر ، اد ايه المصريين دول طيبين اوي بجد ، اد ايه مشاكلهم بتتحل بحاجات بسيطة لو العند والغضب اتشال منها ، اد ايه احنا شعب بجد مسالم بطبيعته محب للناس بطبيعته فرضت علينا قسوة الحياة اننا نبقى قاسيين حتى على نفسنا ، عربية خبطت عربية تانية والطريق وقف .. يااربي.. وموبايلي بيرن بيستعجلوني والمغرب اذنت وبحسب كل دقيقة هتاخرها ، لاقيت بكل هدوء نزل اللي خبط العربية وراح يعتذر للراجل اللي عربيته اتخبطت مع ان شكله كان نازل يتخانق ، وبكل هدوء قال له حصل خير توكل على الله ، معرفش ده حصل لاننا في اول يوم رمضان والعملية لسه طازه ولا لان اللي خبط العربية ده سلوكه في الاعتراف بالغلط وتحمل عواقبه ، بس اعرف ان فيه مثل بيقول يا بخت من قدر وعفي ، واعرف اننا منهيين عن الغضب اللي بقى سمة من سماتنا ومبنحسش بيه برضه ، ده الواحد لو قعد بس يفكر في الحاجات دي تعمل اد ايه ذنوب دماغه هتفرقع

يارب النهاردة الواحد يكمل يوم رمضان بدون غلطه واحده او ذنب او اي حاجة تجرح كامل طاعته لربه وقربه منه ، يارب كلنا جميعا ننال رحمته في الايام دي لاننا فعلا ضعاف اوي