مبروك يا دكتور تامر

صحيح ان دى اول تدوينة على مدونتي الجديدة " من اول السطر " ومفروض اتكلم عن نفسى او عن الحاجات اللى بتشغل تفكيرى او عن الحاجات اللى نفسى اكتبها من فترة عن ناس بحبهم وليهم فضل كبير عليه لكن النهاردة صادف حدث جميل احب ابدأ بيه الكلام ، الحدث المهم والخطير والتطور الحقيقى للخروج من حياة العزوبية والارتباط المؤدي بالطبع الى الزواج المؤدى بالطبع الى حمل الهم والمسئولية اللى احيانا بيكون التهرب منها اصعب من تحملها

النهاردة خطوبة واحد من اعز اصحابي ، تامر هيخطب النهاردة .. الف مبروك يا دكتور وخلينى اتكلم عنك شوية بقى فى حفل تأبينك .. قصدى فى يوم خطوبتك ، تامر فى اخر سنة فى كلية طب .. طبعا اللى يشوف تامر ويصاحبه ميحسش نهائيا انه طالب فى اخر سنة طب لانه مقضى الحياة وبيذاكر لما يفتكر وبياجل امتحانات وحركات كده ، وقت كتير بيقضيه فى حاجات بيحبها زى العزف على الجيتار والقراءة ومتابعة البرامج الحوارية ومشاهدة الافلام الاجنبية تحديدا ، وحاجات هو مش عارف بيحبها ولا لا لانها بتضيع وقت كتير زى النت وخصوصا الشات .. تامر أيضا عازف جيتار ماهر جدا فى رأيي وفنان يجيد التعامل مع الاشياء بحس عالي قد لايبدو عليه احيانا

طبعا لازم اتكلم عن خفة دمه وتلقائيته اللى احيانا بتخلينا نعيط من كتر الضحك غصب عننا من كتر القفشات المتبادلة بيننا لدرجة اننا من سنة ونص تقريبا كنا سهرانين وطلعت فى دماغنا نعمل فيلم عن كفار قريش فى العصر الحديث ويومها فعلا عيطنا من كتر الضحك الهيستيرى ، والله كان فيلم جامد بجد ههههههه ، الصيف اللى فات كنا بنصيف مع بعض فى الاسكندرية وحصلت مهاازل كانت بتخلينا نضحك كما لم نضحك من قبل ، لدرجة اننا سجلنا المواقف دى على الموبايل وبقت متداولة بفضل تقنية البلوتوث اللى نيلت الدنيا اكتر ما هى متنيلة.. لمجرد انى افتكر المواقف دى بضحك او على الاقل ببتسم

طيب نسيبنا من الضحك والتهريج والهزار ونتكلم شوية فى الجد .. انا وتامر بيننا تباينات كتيرة فى طرق التفكير ، هو بيشوف انى عاطفي زيادة عن اللزوم فى علاقاتى مع الاخرين وفى تناولي لبعض الاشياء- خصوصا لما بندخل سينما مع بعض ويلاحظ انى بتأثر بحاجات عبيطة - وبينتقدنى فيها وبنتناقش كتير عنها ، وانا شايف انه بيتعامل مع الامور بحيادية رائعة حتى لو بختلف معاه فى بعضها لكن برضه هو عاطفي لكنه بيتعامل مع العاطفة فى صمت


تامر من اقرب الناس الى قلبى ومن اكتر الناس اللى بحترم وجهة نظرهم مهما اختلفنا لانها ناتجة عن قراءة عميقة وبحث وفهم وتحليل وغير مقيدة بمرجعية فكرية او منهج محدد بينتمى ليه ، بنتفق فى حاجات كتير وبنختلف فى حاجات كتير ايضا لكن دايما بنحتاج الى النقاش المطول الذى يحتد احيانا ليقلب بتهريج وضحك كالعادة واحيانا الى البحث والقراءة

دكتور تامر ... مبروك